ભારતના ઈ-કોમર્સ સેક્ટરની મોટી કંપની Flipkart એ તેના કર્મચારીઓને મોટો ઝટકો આપ્યો છે. Walmart ની માલિકી ધરાવતી આ કંપનીએ તેના વાર્ષિક પરફોર્મન્સ રિવ્યૂ દરમિયાન લગભગ 300 કર્મચારીઓને નોકરીમાંથી કાઢી મૂક્યા છે.
કંપનીએ આ નિર્ણયને સામાન્ય પ્રક્રિયા ગણાવ્યો છે, પરંતુ માર્કેટ એક્સપર્ટ્સનું કહેવું છે કે આ માત્ર પરફોર્મન્સનો મુદ્દો નથી. તેની પાછળ કંપનીની મોટી બિઝનેસ સ્ટ્રેટેજી પણ હોઈ શકે છે.
દરેક લેવલના કર્મચારીઓ પર અસર
રિપોર્ટ્સ મુજબ, કંપનીના કુલ 20,000 થી 30,000 કર્મચારીઓમાંથી લગભગ 1.5% થી 3% સ્ટાફ આ છટણીથી પ્રભાવિત થયો છે. ખાસ વાત એ છે કે આ છટણી માત્ર જુનિયર સ્ટાફ સુધી મર્યાદિત નથી. આમાં નીચેના વિભાગો પણ સામેલ છે: મિડલ મેનેજમેન્ટ, ટેક ટીમ.
કેટલાક ટોપ પરફોર્મર્સ જેઓને નોકરીમાંથી કાઢવામાં આવ્યા છે તેમને કંપનીએ બે વિકલ્પ આપ્યા છે. પોતે રાજીનામું આપવું અથવા સારો Severance Package સ્વીકારવો, સાથે સાથે કંપનીએ તેમને નવી નોકરી શોધવામાં મદદ કરવા માટે Outplacement Support અને આંતરિક નોકરીના વિકલ્પ પણ આપ્યા છે.
Flipkart એ છટણી કેમ કરી?
આ નિર્ણય પાછળ કેટલાક મહત્વના કારણો સામે આવ્યા છે.
- IPO ની તૈયારી
Flipkart ભારતમાં પોતાનું IPO લાવવા માટે તૈયારી કરી રહી છે, જે 2026 ના અંત અથવા 2027 ની શરૂઆતમાં આવી શકે છે.
કંપની રોકાણકારોને નફાકારક દેખાવા માટે ખર્ચ ઘટાડવા માંગે છે.
- બજેટનો દબાણ
માતૃ કંપની Walmart એ Flipkart નું 2026 નું બજેટ રિજેક્ટ કર્યું હતું. ત્યારબાદ કંપની પર પ્રોફિટ બતાવવાનો ભારે દબાણ વધ્યો છે.
- કઠોર સ્પર્ધા
Flipkart ને Amazon અને Meesho જેવી કંપનીઓ તરફથી ભારે સ્પર્ધાનો સામનો કરવો પડી રહ્યો છે.
મોટા ડિસ્કાઉન્ટ વોરના કારણે કંપનીનો પ્રોફિટ માર્જિન ઘટી ગયો છે.
- કંપનીમાં રીસ્ટ્રક્ચરિંગ
થોડા સમય પહેલા Flipkart એ પોતાની સબસિડિયરી ANS Commerce પણ બંધ કરી હતી અને તેની આખી ટીમને દૂર કરી હતી.
કંપની હવે પોતાને વધુ સ્લિમ અને કાર્યક્ષમ બનાવવાનો પ્રયાસ કરી રહી છે.
કર્મચારીઓમાં ભયનું વાતાવરણ
ભારતીય સ્ટાર્ટઅપ ઈકોસિસ્ટમમાં છેલ્લા કેટલાક વર્ષોમાં છટણીનો ટ્રેન્ડ વધતો જોવા મળ્યો છે.
Flipkart એ પહેલા પણ 2023 અને 2025 દરમિયાન ખર્ચ ઘટાડવાની પ્રક્રિયાનો ઉલ્લેખ કર્યો હતો.
બીજી તરફ Meesho ઝડપથી વૃદ્ધિ કરી રહી છે, જ્યારે Flipkart નું મુખ્ય પ્લેટફોર્મ હજુ પણ કઠિન સ્પર્ધાનો સામનો કરી રહ્યું છે.
આગળ શું થશે?
Flipkart એ પોતાના નિવેદનમાં કહ્યું છે કે તેઓ કર્મચારીઓ માટે આ ટ્રાંઝિશન સરળ બનાવવાનો પ્રયાસ કરશે.
પરંતુ ઇન્ડસ્ટ્રી એક્સપર્ટ્સનું માનવું છે કે આવતા મહિનાઓમાં કંપનીમાં વધુ મોટા ફેરફારો જોવા મળી શકે છે.
